Photo: Lephalale: Parke gaan nie gou beter lyk nie
17 February 2012
Valerie Cilliers
News: LEPHALALE - Personeel tekorte en verouderde toerusting is die rede waarom parke en pad reserwes in Lephalale slegter daarna uitsien as vyf jaar gelede. Dit was die antwoord hierdie week van Kobus Roux wat met sy span van sowat 40 werkers verantwoordelik is vir parke in en om Lephalale.
Noordelike Nuus het met hom gesels na aanleiding van verskeie klagtes deur lesers. Hy verduidelik dat gras in parke en pad reserwes minder gereeld gesny word omdat daar vandag minder personeel is wat na ‘n groter gebied moet omsien.
Daar bestaan volgens Roux tans verskeie vaktures in die afdeling.
“Ons vra elke jaar aan die Raad om meer mense aan te stel, maar die begroting laat dit nie toe nie. Paaie en parke is die twee afdelings in ‘n stadsraad waar die munisipaliteit nie geld genereer nie. Daarom is dit seker nie altyd die nommer een prioriteit wanneer daar geld begroot word nie.”
Weens die feit dat die Munisipaliteit tegnies bankrot is asgevolg van uitstaande water-, elektrisiteit- en grondbelastingsgelde en die feit dat dit grootliks afhanklik is van gelde van provinsiale departmente, wat self onder finansiële druk verkeer, meen Roux dat die toestand van parke en pad reserwes nie gou gaan verbeter nie.
“Ons doen wat ons kan, maar sonder personeel en nuwe toerusting is dit baie moeilik.”
