Goeie landboujaar lê voor... - maar TOPS kan wildboere pla

Goeie weerstoestande, relatiewe stabiele en hoë kommoditeitspryse, die stabilisering van wêreldvoedselvraag en ‘n moontlike  swakker rand is almal faktore wat daartoe kan bydra dat 2012 ‘n goeie jaar vir boerdery in Suid-Afrika gaan wees.
Ernst Janovsky, hoofbestuurder vir Absa Agribesigheid glo dat die winsgewendheid van die land se landbousektor toeneem, en dit lei tot ‘n stabiele styging in eiendomswaarde van plase. Volgens lanbou.com verwag Janovsky dat die bedryf ook groot voordele gaan trek uit die toename in die gebruik van nuwe tegnologie vir landbouproduksie. Hy sê dit blyk dat Suid-Afrika, veral in terme van Afrika, die land is waarbinne die gebruik van nuwe tegnologie die vinnigste toeneem.
Wat wildboerdery in 2012 betref glo Wildlife ranching SA (WRSA) president Jacques Malan dat die bedryf reeds sy kritici verkeerd bewys het met deurlopende sterk, volhoubare ekonomiese groei in 2011. Tog glo hy dat daar groot uitdagings vir die bedryf in die nuwe jaar gaan wees. Die TOPS-regulasies is volgens hom die grootste hiervan. Volgens Malan het die departemente by verskeie geleenthede aangedui dat hulle alle wildspesies by TOPS (Threatened Or protected Species) wil insluit. “Dit sal spesies soos swartwitpens, kudu, impala, zebra en andere wat nog nooit op die lys was nie, affekteer . Dit ten spyte van WRSA-lede se bydraes tot die vermeerdering van hierdie spesies se getalle.”
Malan glo die regering wil hierdie roete volg om te voorkom dat ‘n aparte stel regulasies vir algemene wildsoorte opgestel moet word. “Dit is aan ons verduidelik dat alle spesies op die lys geplaas gaan word en dan weer vrygestel sal word indien dit bevind word dat hulle nie bedreig is nie. Daar is egter geen waarborg dat spesies wel afgehaal sal word nie en die moontlikheid bestaan dat ons in die toekoms algemene wild spesies net met permitte sal kan jag. “
Malan raai alle wildboere aan om by die WRSA aan te sluit en nie passief net te hoop dat die bedryf sal groei nie.