Isabella (2) veg voort na vuur-ongeluk

Ek wens ek kon vir iemand kwaad wees, maar dit was ‘n fratsongeluk .” So beskryf Anice Kruger die tragiese gebeure van Oujaarsaand op hulle plaas, Friesland, net buite Lephalale waar Kruger se twee-jarige dogtertjie, Isabella, derde graadse brandwonde oor 80% van haar ligaampie opgedoen het.
Wat ‘n heerlike saamkuier geleentheid vir familie moes wees het in ‘n nagmerrie ontaard toe’n bottel met vuuraansteekmiddel in Isabella se pa, Erwin Kruger, se hande ontplof het. Hoewel hy naby die vuur gestaan het, word daar vermoed dat gasse in die bottel weens die hitte van die vuur ontplof het.
Isabella het enkele meters van haar pa af op die gras gespeel toe ‘n bol vlamme haar verswelg.

Kruger het hierdie week aan Noordelike Nuus vertel dat sy op daardie stadium binne in die huis was en dat die ontploffing soos ‘n geweerskoot geklink het. Buite het sy haar kind in vlamme op die gras sien lê. Haar eerste reaksie was om haar hemp uit te trek om die vlamme daarmee te blus. Haar ma het Erwin se hande met ‘n mat toegemaak om die vlamme teblus.
Anice het met Isabella en Erwin Marapong privaat hospitaal toe gejaag waar personeel nie ‘n dokter kon opspoor nie. “Ek het haar op ‘n bed in die hospitaal neergesit en geskreeu dat iemand ons moet help. Daar was geen bystand dokter aan diens nie en ons is gevra om eerder na die staatshospitaal in Ellisras te gaan. Daar is ons ook nie dadelik gehelp nie en dit was Dr Minaar wat uiteindelik tot ons redding gekom het.” Volgens die uitvoerende hoof van die Ellisras hospitaal, Maria Moabelo is die distrikshospitaal nie gerat om brandwonde van daardie graad te behandel nie en word pasiënte gewoonlik na Mokopane of Polokwane verwys.
Isabella en Erwin is albei per ambulans na die Garden City Hospitaal in Brixton geneem waar Isabella na verwagting die volgend drie maande in die intensiewe eenheid behandeling sal ontvang. Anice vertel dat sy onder sterk verdowing is en dat haar wonde elke tweede dag skoongemaak word. “Sy is op medikasie om te verhoed dat haar organe ingee. Haar hartjie kry baie swaar, maar sy is ‘n dapper vegtertjie. Haar toestand is kritiek en sy is aan ‘n asemhalingstoestel gekoppel.”
Infeksie en bloedverlies tydens die skoonmaakproses het daartoe gelei dat sy ‘n bloedoortapping moes kry. Isabella se hart het verlede Donderdagoggend, vyf dae ná die voorval, gaan staan. Dokters kon egter daarin slaag om haar te red. “Nou kan ons net bid en glo dat haar ligaampie sterk genoeg sal wees om gesond te word.”
Erwin het 1ste, 2de en 3rde graadse brandwonde aan  sy hande opgedoen en het vroeg die week koors begin kry toe van die wonde ontsteek het. “Die realiteit en skok van wat gebeur het, is vir hom baie erg,” vertel Anice.
Isabella het ‘n ses maande oue boetie, Arno wat tans deur Anice se ouers op die plaas versorg word.
Volg Isabella se vordering saam met ons op Facebook.