Los ons wapens - SA Jagters
Date:
Read:
Die SA Jagters en Wildbewaringsvereniging (SAJWV) het beswaar gemaak teen ‘n algemene stelling dat wapens in private besit in geweld en intimidasie teen vroue en kinders gebruik word.
“Dit is ‘n onbillike veralgemening en blatante versinsel,” het Dr. Herman Els, bestuurder van jag en bewaring by SAJWV gesê.
SA Jagters se reaksie volg op ‘n artikel wat op 7 Desember in Die Burger verskyn het wat lui dat Dr. Naeemah Abrahams van die Mediese Navorsingsraad glo versoek het dat die voorgestelde wysigings in die vuurwapenwet teengestaan behoort te word omdat dit tot meer geweld teen vroue en kinders sal lei. Dr. Abrahams het deelgeneem aan ‘n bespreking oor 16 dae van aktivisme teen geweld teen vroue en kinders wat by die Saartjie Baartman-sentrum gehou is.
Els sê dat mense wat geneig is tot intimidasie en geweld teen vroue en kinders nie ‘n vuurwapen nodig het om sulke onverskoonbare dade te pleeg nie. “Só ‘n onregverdige en irrasionele stelling soos wat Dr. Abrahams na bewering gemaak het, dra geensins by om geweld in ons samelewing te bekamp nie.”
Hy het die MNR en ander owerhede versoek om eerder die onderliggende oorsake van geweld teen vroue en kinders in ons gemeenskap te ondersoek sodat ons kan verstaan waarmee ons te make het en dan daadwerklik kan optree.
Volgens die artikel het Dr. Abrahams gesê die voorgestelde wysigings tot die vuurwapenwetgewing verlaag die ouderdomsperk vir vuurwapeneienaars en verhoog die aantal vuurwapens wat een persoon mag besit.
“Dit is glad nie waar nie. Haar interpretasie van die voorgestelde wysigings tot die Wet op die Beheer van Vuurwapens is verkeerd. Die ouderdomsperk bly 21 en die hoeveelheid vuurwapens word steeds streng gereguleer,” het Els gesê.
Els het Maandag aan Noordelike Nuus gesê dat die grootste wysiging wat moontlik in Maart in werking sal tree handel oor die uitreiking van bevoegdheidssertifidate vir voorlaaiers. ‘n Verdere verandering is dat bevoegdheidssertifikate nou gekoppel sal word aan die tydperk van die wapenlisiensie. “Daar is geen veranderinge gemaak aan ouderdomsperk of hoeveelheid vuurwapens wat ‘n persoon mag besit nie. Dr. Abrahams is ook verkeerd in haar stelling dat private vuurwapen besit tot geweld lei. Statistieke wys dat dit grootendeels polisievuurwapens is wat by baie voorvalle van geweld gebruik word.”
