Mogol krokodil eis glo lewe
Date:
Read:
LEPHALALE - Dit gons onder die Bosveld-gemeenskap oor krokodille in die Mogolrivier nadat ‘n Zimbabwïer Sondagmiddag omstreeks 15h00 deur ‘n krokodil gevang is.
Volgens gerugte het lede van die publiek wat naby die laagwaterbrug by die Beska-afdraai visgevang het, die betrokke man gewaarsku om nie daar te swem nie. Die man het volgens ooggetuies onder die water verdwyn en is nie weer gesien nie. Polisieduikers van Polokwane het Maandagoggend na die lyk gesoek, maar niks gekry nie.
Adjudant offisier, Frans Mokoena, doen ‘n beroep op die publiek om nie in die Mogolrivier te swem veral as die watervlak so hoog is nie.
Anna du Toit van die plaas Monte Christo wat aan die rivier grens sê sy waarsku al baie jare dat daar groot krokodille in die rivier is. “As ons in die aand langs die rivier stap en ‘n lig oor die water skyn is dit net oë.”
Du Toit sê sy sien gereeld mense wat halflyf in die water instap om vis te vang.
