Groot aspirasies vir nuwe Hoërskool
Date:
Read:
LEPHALALE – Ten spyte van "logistieke rompslomp” deur die Departement van Onderwys, sê die nuut-aangestelde hoof van Lephalale Hoërskool, Jasper Louw, is hy baie opgewonde oor die uitdaging wat aan hom gestel is.
Dié parallel medium skool sal tydens die 2012 skooljaar Graad 8 en 9 leerders kan akkommodeer en inskrywings kan tot verdere kennisgewing by Laerskool Bosveld Primary gedoen word.
Volgens 'n woordvoerder van die Departement sal die skool eers in 2013 Graad 10 en 11 kan akkommodeer en dan teen 2014 sy eerste groep Graad 12 leerders.
Louw het die week aan Noordelike Nuus gesê dat daar nog baie min stuktuur in plek is, maar dat hy kans sien vir die uitdaging om die skool binne die eerste paar jaar onder die Top 20 akademiese skole die provinsie te omskep.
“Akademie is vir my die nommer een prioriteit en ek is bereid om hard te werk om van die skool ‘n sukses te maak,” sê Louw.
Intussen kon Noordelike Nuus ook verneem dat ‘n waarnemende hoof vir Lephalale Laerskool, ook ‘n parallel-medium skool, wat tans op die hoek van Ramathlodi en Boerboon Straat in Onverwacht gebou word, aangestel is. Volgens die Departement van Onderwys sal 'n ene M.P Maboga as hoof waarneem vir die skool wat nou reeds registrasies aanvaar vir Graad 1 -7 leerders vir Januarie 2012.
