Pienk vir Pippie!

LEPHALALE - Die nuus oor die twee-jarige Isabella (Pippie) Kruger van Lephalale wat op Oujaarsaand erg verbrand het toe ‘n bottel vuuraansteekmiddel naby haar ontplof het, het mense landswyd aan die bid. Ter ondersteuning van klein Pippie het duisende weldoeners onderneem om  vandag (Vrydag) pienk te dra. 
Sangers Bobby en Karlien van Jaarveld, asook Karen Ferreira, het hierdie week ook ingestem om ‘n konsert ten bate van die “Pippie se gesiggie fonds” hier in Lephalale se Mogolsaal aan te bied. Die konsert word vir 18 Februarie beplan, hou gerus die Noordelike Nuus dop vir meer inligting of skakel die organiseerder Elize Swart by 072 340 9016. Elize het saam met Pippie se ma, Anice Kruger, grootgeword en staan haar vriendin by.
Hoe gaan dit met Pippie?
Anice vertel dat sy wonderlike vordering maak. “Haar hartjie en niere het mooi herstel en selfs die infeksie is baie minder. Ons sukkel egter om haar rooibloedligaamtelling hoër te kry. Pippie se wonde is weer Woensdag in teater skoongemaak en sy het baie bloed verloor.”
Die dapper klein dogtertjie is Donderdagoggend weer teater toe, hierdie keer om die asemhalingstoestel waaraan sy die afgelope maand gekoppel was, te verwyder. Sy moes ‘n tracheostomie ondergaan om haar weer te leer asem haal.
Hoe kan ek help?
Die ‘Pippie se Gesiggie fonds’ sal binnekort in ‘n Trust omskep word. “Ons is besig om met prokureurs te gesels om ‘n Trust op te stel om uiteindelik ook ander kinders wat gebrand het te help,” vertel Anice. Die rekening besonderhede is: 
C. A. Kruger, ABSA Bank – Ellisras. Spaar rek: 147 816 9228 of stuur ‘n SMS met die woord ‘pippie’ na 38008 om ‘n R10 donasie te maak.
(Die poskantoor rekening se geld word na die trustfonds oorgeskuif en is dus nie meer in gebruik nie.)